Анатоль Каханчык: Я ў шпіталі, адміністрацыя ІЧУ афіцыйна зняла з мяне арышт
Жыхар Полацку Анатоль Каханчык, якога 21 снежня асудзілі на 25 сутак адміністрацыйнага арышту, трымаў у віцебскім ІЧУ сухую галадоўку. На 5 дзень, калі стан ягонага здароўя моцна пагоршыўся, адміністрацыя ізалятару вымушаная была выклікаць хуткую і адправіць Каханчыка ў шпіталь. Як паведаміў на сваёй старонцы ў Фэйсбуку Анатоль Каханчык, з яго нібыта «афіцыйна знялі арышт». Піша, што «зараз свабодны» і паціху аднаўляе здароўе.
«Пішу са шпіталю. На 5 содні сухой галадоўкі ў віцебскім ІЧУ пачаліся праблемы са здароўем. Ныркі, ціск узняўся да 220, спазмы, сутаргі, неверагодная слабасць (мне ўсё ж – 62 гады). Таму што галадоўку спыніць я адмовіўся, адміністрацыя ІЧУ выклікала хуткаю дапамогу і афіцыйна зняла з мяне арышт», – напісаў у «Фэйсбуку» Анатоль Каханчык.
Паведаміў таксама, што быў вельмі здзіўлены тым, што не пачуў у віцебскім ізалятары ніводнага мацюка. Начальнік ІЧУ падаўся Каханчыку справядлівым і «ўсе пытанні вырашаў адразу». Рахунак за харчаванне ніхто яму не падсунуў, як гэта рабілі ў іншых ізалятарах, калі ён не ўжываў у камеры нават вады.
«Зараз спадзяюся сустрэць Новы год удома, а не на новай галадоўцы, калі зноў затрымаюць», – падсумоўвае Анатоль Каханчык і дзякуе ўсім, хто яго падтрымліваў.
Гаспадар БЧБ-хаты Анатоль Каханчык трапіў у шпіталь – ён трымаў галадоўку
Подписывайтесь на нас в: Яндекс, Дзен, Google Новости, Telegram-канал, «секретный» Telegram-чат!
