Антон Грышкевіч: Што мы можам зрабіць? Я раблю свае відэа-плакаты
Тэатральны рэжысёр і былы выкладчык віцебскага каледжу культуры і мастацтва, як і шмат хто з неабыякавых людзей, шукае свой уласны спосаб сказаць «не» вайне ва Украіне.
Тады як нехта запісвае відэазвароты, дасылае лісты ва ўладныя структуры, выходзіць на плошчу з блакітнымі і жоўтымі кветкамі, Антон Грышкевіч вырашыў ствараць плакаты-відэаролікі. Прынамсі, так ён сам называе фармат сваіх мастацкіх прац.
Відэаролікі «NO WAR », «Слава Украіне », «Песня 25.02 » ды іншыя Антон Грышкевіч размясціў на сваім канале на Youtube. Яны кароткія – каля 50 секунд, і таму стваральнік называе іх «плакатамі ». Тым больш, што і пасыл да гледача ў іх ясны і празрысты: трэба зрабіць усё, каб найхутчэй спыніць вайсковыя дзеянні Расеі супраць Украіны.
Яшчэ некалькі відэаролікаў Антон Грышкевіч прысвяціў палітзняволеным, выкарыстаўшы, у прыватнасці, малюнкі мастака-палітвязня Алеся Пушкіна, якога цяпер судзяць у Менску.
Творчасцю ў розных фарматах відэа рэжысёр заняўся не так даўно. Ён вырашыў асвоіць новы для сябе від дзейнасці пасля таго, як страціў працу: 25 студзеня мінулага году, пасля 4-х год працы ў каледжы культуры і мастацтва, ён далучыўся да агульнанацыянальнай забастоўкі, запатрабаваўшы адстаўкі Лукашэнкі, вызвалення палітзняволеных, расследавання ўсіх злачынстваў супраць беларускага народу.
Подписывайтесь на нас в: Яндекс, Дзен, Google Новости, Telegram-канал, «секретный» Telegram-чат!
