Былога супрацоўніка Верхнядзвінскага райвыканкама прызналі палітвязнем

Автор:

Опубликовано:

Август

2024

Комментарии: нет комментариев

Адпаведную заяву аб прызнанні палітычнымі зняволенымі Аляксея Кісялёва і яшчэ 6-ці чалавек беларуская праваабарончая супольнасць агучыла 22 жніўня. 28 жніўня яго крымінальную справу пачнуць разглядаць у Віцебскім абласным судзе. 34-гадовага інспектара сектара спорту і турызму Верхнядзвінскага райвыканкама вінавацяць паводле ч. 1 арт. 361-4 КК (садзейнічанне экстрэмісцкай дзейнасці) і арт. 361-5 КК (праходжанне навучання ці іншай падрыхтоўкі для ўдзелу ў экстрэмісцкай дзейнасці).

Аляксей Кісялёў быў затрыманы сёлета ўвесну. Пра гэта 13 сакавіка паведаміў Telegram-канал, блізкі да сілавікоў. У відэароліку пра ягонае затрыманне сцвярджалася, што хлопец меў «нармальную працу ў райвыканкаме», піша vitebskspring.org.

У «пакаяльным» відэа, запісаным міліцыянтамі, Кісялёў кажа, што браў удзел у навучальнай праграме Аб’яднанага пераходнага кабінета «Кадравы рэзерв», і што за гэта супраць яго распачалі крымінальную справу.

Праграма «Кадравы рэзерв для новай Беларусі » была створаная Аб’яднаным пераходным кабінетам у лістападзе 2022 года з мэтай падрыхтоўкі чыноўнікаў, якія будуць праводзіць рэформы ў органах дзяржаўнага кіравання пасля дэмакратычных пераменаў у краіне.У лютым 2024 года ўлады прызналі гэтую праграму «экстрэмісцкім фармаваннем».

Праваабаронцы адзначаюць, што артыкул 361-5 быў уведзены ў Крымінальны кодэкс Беларусі толькі ў 2021 годзе, і што разгляд крымінальнай справы Аляксея Кісялёва — гэта толькі другі суд у Беларусі паводле гэтага артыкула. Справу ў закрытым рэжыме будзе разглядаць суддзя Віцебскага абласнога суда Юрый Урбан.

На гэтым тыдні суды Віцебшчыны анансавалі чатыры судовыя працэсы «за распаўсюд экстрэмізму»