Чарговы ваенізаваны дзіцячы клуб стварылі на Віцебшчыне

Автор:

Опубликовано:

Ноябрь

2022

Комментарии: нет комментариев

У Шумілінскай СШ №1 распачаў працу вайскова-патрыятычны клуб «Юны гвардзеец». Раней на Віцебшчыне практыкавалася завядзёнка ствараць вайскова-спартовыя клубы для дзяцей і падлеткаў, дзе хаця б «для шырмы» абвяшчалася, што галоўны вектар працы – гэта клопат пра здароўе юнага пакалення. Хаця і там спартовая падрыхтоўка больш нагадвала вайсковыя зборы… Прэзентацыя клубу «Юны гвардзеец» адбылася на Алеі Славы ў гарадскім парку каля брацкіх могілак.

Мэты стварэння Шумілінскага клуба «Юны гвардзеец» маюць выразны ідэалагічны складнік і сведчаць пра адпаведную пазіцыю раённага кіраўніцтва. «Ва ўмовах гібрыднай вайны, якую Захад вядзе супраць нашай краіны, адкрыццё клуба будзе дапамагаць фарміраванню праўдзівага ўяўлення дзяцей і падлеткаў аб падзеях Вялікай Айчыннай вайны, будзе спрыяць патрыятычнаму выхаванню моладзі», – заявіў падчас адкрыцця клуба старшыня раённага Савета дэпутатаў Мікалай Будневіч. Відавочна, што апрача ідэалагічнага выхавання, арганізатары зоймуцца і вайсковай падрыхтоўкай беларускіх падлеткаў. Кіраўнік раённай арганізацыі ГА «Беларускі саюз афіцэраў» Валерый Жандараў уручыў клубу грашовы сертыфікат на развіццё матэрыяльнай базы і паабяцаў «усебаковую падтрымку арганізацыі ў выхаваўчым працэсе».

Запрошаны з Полацку намеснік камандзіра вайсковай часці Сяргей Літвінаў падкрэсліў, што вайскоўцы гатовыя паспрыяць выхаванню павагі да Узброеных Сіл папулярызацыі тэрміновай службы, а таксама прафарыентацыйнай рабоце для паступлення ў сілавыя навучальныя ўстановы.

Кіраўніком клубу прызначаны 39-гадовы настаўнік гісторыі Шумілінскай СШ №1 Сяргей Сахончык – спартовец-аматар, удзельнік раённай выбарчай камісіі падчас мінулых прэзідэнцкіх выбараў, дэпутат Шумілінскага райсавета 28-га склікання (вылучаўся ад БРГА «Белая Русь»).

Вайскова-патрыятычны клуб «Юны гвардзеец» – першы моладзевы клуб такой накіраванасці ў рэгіёне. Але прадстаўнікі ўлады падчас урачыстага сходу выказалі меркаванне, што неўзабаве гэтая ініцыятыва будзе працягвацца ў іншых школах.