У Полацку затрымалі сына Вольгі Брыцікавай, якая адбывае 15 сутак
Старшыню пярвічнай арганізацыі Беларускага Незалежнага прафсаюзу на ААТ «Нафтан» затрымалі 1 лістапада. Назаўтра з войска вярнуўся яе сын Ягор, які прадстаўляў інтарэсы маці на судзе 3 лістапада. Вольгу Брыцікаву пакаралі арыштам нібыта за распаўсюд экстрэмісцкіх матэрыялаў.
Сына лідаркі незалежнага прафсаюзу затрымалі 10 лістапада, калі ён вяртаўся з Наваполацкага цэнтру ізаляцыі правапарушальнікаў. У ЦІП, дзе ўтрымліваюць яго маці, ён хадзіў штодня, бо мае правы прадстаўляць інтарэсы Вольгі Брыцікавай, і таму яго пускалі на спатканні. Падставы для ягонага затрымання не вядомыя. Суду пакуль не было.
Яго маці Вольга Брыцікава трапіла за краты ўжо шосты раз на працягу гэтага году: яе пяць разоў запар арыштоўвалі на 15 сутак па адміністрацыйным артыкуле 24.23 – нібыта за несанкцыянаванае пікетаванне. Тады яна правяла за кратамі 75 сутак без перапынку. А 19-й гадзіне стала вядома, што хлопца адпусцілі.
Подписывайтесь на нас в: Яндекс, Дзен, Google Новости, Telegram-канал, «секретный» Telegram-чат!
