У Віцебску 7-га лістапада запланавана ўрачыстае адкрыццё бюста Леніна
Бетонны бюст вырабу 1969г. з’явіцца каля паліклінікі №4, якая носіць імя Леніна. Калісьці падобны артаб’ект тут ужо быў, але ўночы з 4 на 5 жніўня 1994-га году яго пашкодзілі невядомыя асобы. Аднаўляць бюст не сталі, бо ідэі правадыра сусветнага пралетарыяту, дый памяць пра яго самога ўжо не ўяўляліся абсалютнымі каштоўнасцямі на мяжы ХХ і ХXІ стагоддзяў. І вось больш як праз 25 гадоў мясцовыя ўлады вырашылі, што Ленін каля паліклінікі ягонага імя проста неабходны. Меркаваннямі гараджан, як і зазвычай, улады не пацікавіліся.
Заменіць пашкоджаны бюст дужа падобная да мінулай скульптурная выява. Яе збіраюцца «перасяліць» з былой тэрыторыя РАУС Кастрычніцкага раёну. Там бетонны бюст Леніна стаяў ва ўнутраным двары, адмежаваны ад мінакоў высокім плотам і калючым дротам. Цяпер, калі райаддзел міліцыі пераехаў у новы будынак на вул.Церашковай, былыя «міліцэйскія» памяшканні выстаўлены на продаж амаль за 3 мільёны беларускіх рублёў – гэта цэлы комплекс гістарычнай забудовы вуліцы Суворава (былой Узгорскай). Кошт бюсту Леніна ў ацэначную вартасць комплексу не ўвайшоў – яго аддалі на рэстаўрацыю.
Тое, што гэта не твор мастацтва, а «штампоўка» – тыповая для савецкіх часоў выява Леніна, цяперашнія ўлады ніколькі не бянтэжыць. Як і тое, што ва ўсім свеце, апрача Беларусі, імкнуцца пазбавіцца ад падобных скульптур або перадаць іх у спецыялізаваныя экспазіцыі. 7-га лістапада, да чарговых угодкаў Кастрычніцкай рэвалюцыі, бюст Леніна плануюць адкрыць ва ўрачыстай абстаноўцы з абавязковым удзелам чальцоў камуністычных партый, БРСМу і «Белай Русі».
Подписывайтесь на нас в: Яндекс, Дзен, Google Новости, Telegram-канал, «секретный» Telegram-чат!
