У Віцебску стварылі абласны медыяцэнтр, каб вучыць журналістаў «правильно транслировать информацию»
Медыяцэнтр урачыста адчынілі 10-га лютага ў памяшканні рэдакцыі абласной газеты «Витебские вести». У ліку запрошаных былі міністр інфармацыі Уладзімір Пярцоў, старшыня ГА «Белорусский союз журналистов» Андрэй Крывашэеў, прадстаўнікі абласных, гарадскіх і раённых уладаў. І ўсе яны, кожны на сваім узроўні, выказвалі спадзяванні, што медыяцэнтр паспрыяе ідэалагічнаму выхаванню жыхароў Віцебшчыны і навучыць журналістаў трансляваць інфармацыю такім чынам, каб задаволіць густы яе спажыўцоў, якія ўжо даўно не вераць дзяржаўнай прэсе.
Падчас адкрыцця шмат гаварылася пра тое, каб зацікавіць моладзь, якая любіць TikTok, YouTube, Instagram, і цалкам ігнаруе «пенсіянерскія» выданні з рэцэптамі кансервацыі і рэкламай пахавальных кантор. А таксама і пра тое, як захаваць тую частку аўдыторыі, якая прывыкла звяртацца ў газету дзеля вырашэння бытавых праблем з уборкай пад’ездаў і асвятлення вуліц. Канткрэтных прапановаў было не дужа багата, затое прагучала вельмі шмат спадзяванняў, на тое, што медыяцэнтр стане пляцоўкай для навучання журналістаў сучасным тэхналогіям, для сустрэчаў чыноўнікаў, работнікаў СМІ і грамадскасці, брыфінгаў, відэасустрэч і гд. Інакш кажучы, на базе газеты «Витебские вести» адчынілі нешта накшталт новай канферэнц-залы, наяўнасць якой сама па сабе мала на што ўплывае.
Тым не менш, з рыторыкі ўдзельнікаў урачыстага адкрыцця было зразумела, што дзяржаўныя медыі не ў сілах уплываць на свядомасць грамадзян у той ступені, у якой ім было загадана. Таму задачы для СМІ, якія сталі «полем барацьбы», фармуляваліся практычна ў стылі вайсковага часу: «утрымліваць фокус увагі аўдыторыі, адукоўваць, тлумачыць», «закрываць патрэбы жыхароў у атрыманні аб’ектыўнай інфармацыі», асвятляць у адпаведным ключы «тыя ці іншыя рашэнні, якія прымаюцца ўладамі», выхоўваць «давер і павагу да органаў улады» і гэтак далей. Бо, як спрабаваў застрашыць калегаў міністр інфармацыі Уладзімір Пярцоў, у асвятленні праблем Віцебшчыны «инициативу перехватывают наши оппоненты, спекулируют на ней, раздувают до вселенского масштаба и выставляют наше государство в целом как несостоятельное».
Подписывайтесь на нас в: Яндекс, Дзен, Google Новости, Telegram-канал, «секретный» Telegram-чат!
