Учора раніцай затрыманы Барыс Хамайда
Учора раніцай сілавікі правялі ператрус у 76-гадовага віцебскага грамадскага актывіста і затрымалі яго самога. Прычына затрымання пакуль не вядомая. Не выключана, што ў ягоным тэлефоне будуць шукаць прыкметы адміністрацыйнага правапарушэння паводле ч.2 арт. 19.11 – распаўсюд так званых «экстрэмісцкіх» матэрыялаў.
Раней Барыса Хамайду неаднаразова затрымлівалі за «несанкцыянаванае пікетаванне» у цэнтры Віцебску каля дома №28 па вуліцы Леніна, за якім даўно замацавалася найменне «сіні дом». Тут у 1990-я Барыс Ханонавіч ладзіў і сапраўдныя пікеты з тэматычнымі плакатамі, і распаўсюджваў незалежную беларускую прэсу, што таксама сілавікі і суддзі расцэньвалі як пікетаванне. Атрыбутамі пікета яны называлі і бел-чырвона-белы парасон, пад якім стаяў Барыс Хамайда, і стужкі ў нацыянальных колерах, якімі ён аздабляў сваё «працоўнае месца» і нават малітву «Ойча наш», вышытую чырвонымі ніткамі на белай палатніне…
Апошні раз Барыс Ханонавіч трапіў пад суд сёлета ў ліпені: яго затрымалі на станцыі Бігосава ў Верхнядзвінскім раёне, калі спадар Хамайда выправіўся ў традыцыйную пілігрымку ў Росіцу, дзе вернікі ўшаноўваюць памяць мучанікаў Юрыя Кашыры і Антонія Ляшчэвіча — мясцовых святароў, якіх фашысты ў 1943 годзе спалілі ў росіцкім касцёле разам з тамтэйшымі парафіянамі. Прычынай затрымання стала «Пагоня», наклееная на пашпарт, — памежнік, заўважыўшы яе, выклікаў міліцыю. Барыса Хамайду асудзілі да 15 сутак арышту, зноў-такі за несанкцыянаванае пікетаванне.
Як мінімум 84 чалавекі трапілі пад пераслед падчас учорашняга масавага «хапуна» у Беларусі.
Частку з іх затрымалі, а ў некаторых проста правялі ператрус і адпусцілі. Вядома, што сілавікі бяруць у людзей падпіскі аб неразгалошванні.
Барыс Хамайда: «Няхай ведаюць, што я жывы, і Беларусь жывая!»
Подписывайтесь на нас в: Яндекс, Дзен, Google Новости, Telegram-канал, «секретный» Telegram-чат!
