Віцебскія ўлады ліквідуюць установу, якая займалася сацыялізацыяй дзяцей-сірот

Автор:

Опубликовано:

Ноябрь

2021

Комментарии: нет комментариев

Адміністрацыя Першамайскага раёну Віцебску пачала ліквідацыю сацыяльна-дабрачыннай установы «Свет без сірот». Працэдуру распачалі яшчэ 25 жніўня. Неўзабаве чыноўнікі зробяць справаздачу ў вышэйшыя інстанцыі аб паспяховым закрыцці арганізацыі, якая дапамагала сацыялізавацца самай бяздольнай частцы беларускага грамадства – дзецям-сіротам.

Сацыяльна-дабрачынная ўстанова «Свет без сірот» было зарэгістраваная ў снежні 2013 году. Да гэтага актывісты дабрачыннага сацыяльнага руху працавалі з сіротамі на валанцёрскіх пачатках больш за два гады.

Арганізацыя пачала сваю дзейнасць з гучнага праекту. Была створаная і прадэманстраваная грамадскасці выстава фотаздымкаў віцебскіх дзяцей-сірот пад агульнай назвай «Беларусь без сірот». Вынік той акцыі стаў нечаканы для яе стваральнікаў: 16 адзінокіх і кінутых дзяцей набылі новых бацькоў і сямейную ўтульнасць.

Наступнай ініцыятывай «Свету без сірот» быў адукацыйны праект «Урокі Маральнасці», накіраваны на выхаванне дзяцей-падлеткаў. На працягу доўгага часу падлеткі атрымлівалі веды пра такія важныя паняцці, як сяброўства, дабрыня, узаемаразуменне.

Але ж гонарам арганізацыі стаў праект «Настаўніцтва». У яго межах спецыялісты «Свету без сірот» падрыхтавалі настаўнікаў, здольных прышчапіць сацыяльныя навыкі і стандарты паводзінаў дзецям з сіроцкіх установаў. У выніку дзеці, які пражывалі па-за сям’ёй, змаглі атрымаць алгарытмы жыцця ў нармальных хатніх умовах, якія абавязкова спатрэбяцца ім у будучым дарослым жыцці.

Цяпер улады беспадстаўна і ганебна пазбаўляюць Віцебск арганізацыі, якая вырашала важную задачу – сацыялізацыю асірацелых дзяцей, піша vitebskspring.org.